हेटौंडा । हेटौंडा उपमहानगरपालिकाको आयोजनामा समाजमा व्याप्त सामाजिक बेथितीविरुद्ध जनचेतना फैलाउने उद्देश्यले सञ्चालन भइरहेको सडक नाटक कार्यक्रम अन्तर्गत हेटौंडा–१४ स्थित जनज्योती माध्यमिक विद्यालय परिसरमा प्रभावशाली नाटक प्रस्तुत गरिएको छ।
सडक नाटकको अवलोकन नगर प्रमुख मीनाकुमारी लामा, उप–प्रमुख राजेश बानियाँ, वडा नं. १४ का अध्यक्ष दीपक खड्का, तथा सामाजिक विकास महाशाखा प्रमुख भीमप्रसाद तिमल्सिनाले संयुक्त रूपमा गरेका थिए।
राष्ट्रिय कलाकारहरूको टोलीले प्रस्तुत गरेको उक्त नाटकमा वैदेशिक रोजगारीका कारण पारिवारिक विखण्डन र समाजमा देखिने नकारात्मक प्रभाव, लागुऔषध दुव्र्यसनले युवामा ल्याउने अवनति, तथा इन्टरनेट र सामाजिक सञ्जालको दुरुपयोगबाट उत्पन्न समस्याहरूलाई सशक्त रुपमा प्रस्तुत गरिएको थियो।
नगर प्रमुख लामाले समाज रूपान्तरणका लागि यस्ता सचेतना कार्यक्रमहरू अत्यन्त प्रभावकारी भएको बताउँदै नगरले आगामी दिनहरूमा पनि यस्ता कार्यक्रमलाई निरन्तरता दिने प्रतिबद्धता व्यक्त गरिन्। उप–प्रमुख बानियाँले युवा पुस्तालाई लक्षित गर्दै सिर्जनात्मक माध्यमबाट सकारात्मक सन्देश प्रवाह गर्नु उपमहानगरको प्रमुख प्राथमिकता भएको बताए।
सडक नाटक कार्यक्रम हेटौंडा उपमहानगरको विभिन्न वडाहरूमा चरणबद्ध रुपमा सञ्चालन हुँदै आएको छ। आयोजकहरूका अनुसार सामाजिक रूपान्तरणका लागि यस्ता नाट्य प्रस्तुतिहरूले समुदायमा प्रत्यक्ष प्रभाव पार्ने विश्वास गरिएको छ।
