हेटौंडा । मकवानपुरको हेटौंडा क्षेत्रमा लागूऔषध कारोबार भईरहेको विशेष सूचनाको आधारमा प्रहरीले ६ ग्राम ४०० मिलिग्राम खैरो हेरोइनजस्तो देखिने लागूऔषधसहित ७ जनालाई पक्राउ गरेको छ।
जिल्ला प्रहरी कार्यालय मकवानपुर र मातहत प्रहरी कार्यालयहरूको संयुक्त टोलीले साउन २ गते र ३ गते विभिन्न स्थानमा छापा मार्दै अभियुक्तहरूलाई नियन्त्रणमा लिएको हो।
पक्राउ पर्नेमा हेटौंडा उपमहानगरपालिका वडा नं. १ बस्ने २० वर्षीय युवक, वडा नं. ५ सानोपोखराबाट २० वर्षीय युवक, भीमफेदी गाउँपालिका वडा नं. २ कालिकाटारकी १९ वर्षीया युवती, मकवानपुरगढी गाउँपालिका वडा नं. २ बाँसपानीकी १९ वर्षीया युवती रहेका छन्। उनीहरूको साथबाट २ ग्राम २१० मिलिग्राम खैरो हेरोइन बरामद गरिएको छ।
त्यस्तै, हेटौंडा- १५ स्थित रातोमाटे चेकपोइन्टबाट मोटरसाइकल (ना ३७ प ६४४९) सहित पर्साको पोखरिया नगरपालिका वडा नं. १ बनकटवा घर भई हाल हेटौंडा बसोबास गर्ने २७ वर्षीय युवक पक्राउ परेका छन्। उनको साथबाट २ ग्राम ९१० मिलिग्राम लागूऔषध बरामद गरिएको छ।
साथै, सप्तरीका दुई व्यक्ति— सम्भुनाथ नगरपालिका वडा नं. ६ घर भई हाल हेटौंडा वडा नं. ९ लामसुरे बस्ने ३६ वर्षीय पुरुष र राजगढ गाउँपालिका वडा नं. २ बनैनिया घर भई हाल हेटौंडा वडा नं. १० बस्ने ३६ वर्षीय पुरुषको साथबाट क्रमशः १ ग्राम २८० मिलिग्राम खैरो हेरोइन फेला परेको प्रहरीले जनाएको छ।
प्रहरीका अनुसार उनीहरूमाथि मकवानपुर जिल्ला अदालतबाट म्याद थप अनुमति लिएर थप अनुसन्धान भइरहेको छ।
